من أشوفك

من أشوفك
أحس بالأمان
وروحي بوجودك
يغمرها الحنان
وياك يا أرق أنسان
انسى الزمان
انسى المكان
من أشوفك

يا أحلى حلم من الأحلام
گلبي بهواك حب وهام
جمعتني وياك أجمل صدفه
بأسعد يوم من الأيام
أنسى الزمان
أنسى المكان
من اشوفك

بنظرة خجولة ترسل سلام
همس النسيم دافيء الكلام
يامن بنورك نورت روحي
ودنيایه گبلك چانت ظلام
أنسى الزمان
أنسى المكان
من أشوفك

أتمنى لو أغفى وأنام
ليله على صدرك مثل الحمام
شيصر لو أظل أعيش
ولوعمري طال الف عام
أنسى الزمان
أنسى المكان
من اشوفك

حكمت البيداري

مـدري ليـــــش

مـدري ليـــــش ..

لمـن تشـــــوفك عيـــوني
مـدري ليـــــش أســـــرح

تبتســـــم ويايــا ظنــوني
ومـن كـــل عقـلـي أفــرح

گـلبــــي اليـضــــــل يــدگ
وبيــن الـظــــلوع يجــدح

ترتجــف كـــل أعضــــاي
مثل سعف النخل تتمرجح

ومـن الخـجـــــل أمــــوت
أعــرگ وبالعــرگ أسـبح

يـمـتـى تـحــــــس وتـحــن
يـلـي ســــكتـتـك تـذبــــــح

حكمت البيدري

من دون كل الناس

من دون كل الناس

من دون كل الناس .. أنتَ
الرقه والأحساس .. أنتَ
يانبع يروي حنان ... چفوفك بر الأمان
تاج أنتَ فوگ الراس ... وحبي الك ماينقاس
من دون كل الناس .. أنتَ

كلامك حبيبي طعمه عسل ... همسك عواطف مليانه أمل
أنتَ الملك والأمير ... ياأبو الگلب الچبير
يللي بصفاتك ماصار وحصل ..
يانبع يروي حنان ..

أحلامي حبيبي أغلى الأمنيات ... وياك ياروحي شمحلى الحياة
خليت عمري دوم ... يوم أسعده من يوم
ماگدرت علينا شلت الشمات ..
يانبع يروي حنان ..

يحرسك حبيبي رب العباد ... يحميك يبعدك عن الحساد
ياجنتي ياملاك ... العذال كلها فداك
يا مالك مهجتي ... ولب الفؤاد
يانبع يروي حنان ..
من دون كل الناس أنتَ

حكمت البيداري
2002

عجب العجاب

عجب العجاب
حط گلبك جنب گلبي
وأسمع الشوگ والحنان
يله خلي المستخبي
يطلع ويظهر ويبان

لوحصل بينهم عتاب
ح يرگعوا تاني أحباب
بس عوفهم .. بس سيبهم
حتشوف منهم .. عجب العجاب

حكمت البيداري

أحنا أنحبكم

نحبكم

أحنا أنحبكم يا هل ناس
شكد ما بالروح من أحساس

أنتوا الهوا أنتوا الريّا
أنتوا الزاد أنتوا الميّا

لولاكم يموتنا الجوع
والعطش ييبس لظلوع

وتنگطع بينا الأنفاس
ياناس رحمونا أشويا
..

نحبكم للاه بللآه
يل سببتوا النا ألآه

ما عدنا وياكم كل غايه
غيرالحب وأحلى حچايه

ليش الصد ياهل ناس
منوا الراح وأخذ وياه
..

چم دوب انظل نترجاكم
واحنا الما قصرنا وياكم

فتحنا قلوبنا عالبابين
وشلناكم برموش العين

وحطيناكم فوگ الراس
كل هاي .. ما نلنا رضاكم
..

سلمنا وما رديتوا
وياكم أجينا وماجيتوا

عين أبعين شفناكم
تميلون عنا اشجاكم

عدكم قسوة ماتنقاس
ياويله من حبكم يهوا
..

حكمت البيداري

ياصاحبي

ياصاحبي

المايجي أبطخ الراس ... مايجي گوه
شلك على أبن الناس ... غير المروة
بالك تمد أيدك ... للگال ماريدك
كلمة العمر تسوى

ياصاحبي
بحكم الصداقه أرد أسالك
گوه اليحب لو بس الك
اتركهم وعوف
الي يدوّر يشوف
يرخصلك الأغلى

ياصاحبي
درب العشگ شوك وزلگ
كلمن يمر فوگه هللك
أتسمى بالله
وأبعد عن الآه

ضحكات الفرح أحلى

ياصاحبي
أصبر بعد دورة فلك
عالغدر بيك وبدلك
يرد آلك ردود
دموعه عالخدود
بل الخلاك خَللَى

حكمت البيداري

أبتسم أرجوك

أبتسم أرجوك

أبتسم أرجوك ولو لحظه أبتسم
ليش الحزن والهم على وجهك يرتسم
عيش عمرك ساعه ساعه
بكره تندم على ضياعهْ
والندم كاساته سم

أبتسم ارجوك ولو مرة أبتسم

ياحبيب العمر وأغلى
الدنيا حلوه وانت أحلى
كل مصاعبها تهون
بسحر رمشك والعيون
أغمزلها أتصير سهلى
عيش عمرك ساعه ساعه
بكره تندم على ضياعه
والندم كاساته سم

أبتسم أرجوك ولو مره أبتسم

أقترب مني تعال
أنعيد أيام الوصال
يكفي تحرم روحي منك
أحير من تسالني عنك
بُعدك الها هوايه طال
عيش عمرك ساعه ساعه
بكره تندم على ضياعه
والندم كاساته سم

أبتسم أرجوك ولو مره أبتسم

ياحياتي ياصبر مرمر مهجتي
المن أشكي همومي المن وأنتَ علتي
كافي تظلم گلبي كافي
عيوني تسهر وأنتَ غافي
يمتى تضحكلي يمتى ترجّع ضحكتي
عيش عمرك ساعه ساعه
بكره تندم على ضياعه
والندم كاساته سم
أبتسم أرجوك ولو مره أبتسم

حكمت البيداري

أحذر ولاتزعل

من غدر الزمان
أحذر ولاتزعل
من غدر الزمان

لتروح لاتوصل
للماعنده أمان

هاي الدنيا هاي الناس
موفدگصه موفد راس

بيها الوفي والطيب
مثل ما بيها الخوان

لا تزعل حياتي

شمادارت بينا الأيام
الك فدوه سنين الصبر

لا يهمك حبيبي

أنت الأمل والأحلام
ولولاك شيسوا العمر

أبعد عنك أبعد
ظلام ظنونك

يكفيني اشوفك
تضحك عيونك

لا والله يل غالي
ماغبت عن بالي
أنتظرك تجيني
اتشوفني أشحالي

يانبع الحنان
ياحضن الأمان
من غدر الزمان
آه
آه
من غدر الزمان

حكمت البيداري
3-7- 3-7-2007

ياصديقي ياسهران

ياصديقي ياسهران
ياصديق العمر ياطيب
یاسهران
ياسائل الليل بسماك
ليش تعبان

مهدود حيلك أشوفك
عاشگ ولهان
تسأل عن القسمة
وعن النصيب
والرابح
والخسران

سمعت الليل
أشكلك
كلامه عدل
حگ الميزان
صدگ الليل ماكذب
كلامه أمان
خلي الأمل
خَلّيه دوم وياك
والك عنوان

گللي
هم أبيوم سمعت
وللا شفت
وكف الزمان
وللا الشمس زعلت
وبطلت تطلع
ونورها يبان

ياصديقي
يكفيك أتعيش
مرتاح الضمير
سعيد فرحان
ودگات گلبك
خلها أتزيد
لعمل الخیر
والأیمان

أحلم
وحقق أحلامك
ولولا الهمة
الحديد مالان
موعجيبه
ولاحرام
يتحقق حلم
للأنسان

حكمت البيداري

أهم شي

أهم شي

يكون الك ثقه بنفسك
أهم شي لاتقبل أحد يمسك

گول أشما عندك وبكل صراحه أحچي
المن تظم دمعك بحزن وفرح أبچي

ولت سكت أبد حسك

أهم شي

أزرع الخير لكل الناس
لابد يوم تحصد الخير وي الناس

الدنيا حلوه أبناسها
همه أساس أساسها

وأنتَّ واحد من هل الناس

أهم شي

خليك مُسامح خل گلبك عذير
بالك يوم تنسى بس ربك الچبير

وتحمل زللات الجاهل
عل الحق أبداً لا لتجامل

عيش حر مثل الطير
وين أتريد روح طير

أهم شي

أنصحك لا لتغامر
لا تبدل يومك أباچر

أحلامك خليها حقيقه
مثل أحلام العصفور

عش زغير بشجرة حديقه
وحبيبه تمليه زهور

وبغير چَدك لا لتكابر

أهم شي

حكمت البيداري

شي وأنكسر

شي وأنكسر
مايرجع صحيح
يبقى الأثر
يبقى، يذكر الجريح
أنصحك گبل العتب
أعرف أشچان السبب
ومهما صبر
اللي يتألم يصيح
شي وأنكسر
مايرجع صحيح

ياصديقي
العمر أيام تمضي
حلوه ومره
أيّام دموع وحزن
وأيّام ضحكه ومسره

ياصديقي
أحنه هم لازم أنضحي
الناس كلها أمضحيه
أيّام غيم ومطر
وأيّام شمس ومصحيه
وثمر الشجر لابد .. لازم يطيح
شي وأنكسر مايرجع صحيح

ياصديقي
إِللي فاتك .. راح
لاترجع تعده
والجاي الك مجبور
رايح تهده

ياصديقي
اللي باعك أشتريه بسعره
لا تبيعه
أخذ من غدره عبره
لا تضيعه
أتعب أكثّر
أكثّر من ما تستريح
شي وأنكسر
مايرجع صحيح ..

حكمت البيداري
بغداد 1996

مهداة لصديقي العزيز دانيال ميخائيل دانيال

ضرير

ضرير
بس من حقي أحب
أنسان عندي روح وگلب
المشاعر نفس المشاعر بيني وبينك
أني احس بوجودك وأنتَّ تشوف أبعينك
مثلك أفرح مثلك أضحك
مثلك أحزن ودموعي تصب
..
ضرير
هذا هوا قدري
مو بيدي أمري
مؤمن بأمر الله ينورلي روحي نور
مؤمن بأمر الله أعبر ظلام البحور
مو كل البشر تملك مثل صبري
..
ضرير
لكن..أفكاري دافئه جميله
عواطفي شفافه نبيله
دوم تلكاني مبتسم
صادق في كلامي
ما أفرق من أسلم
للناس كلها سلامي
هذا طبعي ما أعرف الحيله
..
ضرير
تكفيني عصاتي وهى دلليل الضرير
أحلامي بسيطه مثل أحلام العصافير
أثق بكل الناس وأنطيها أيدي
يوم الأصادف صديق يصير عيدي
يكفيني أمشي وياه
ما أطمع أطير
ضرير

حكمت البيداري
بغداد 1998

طير الَگطى

طير الَگطى

گلبي الك .. طير الگطى

أرجوك لاتفكر بالخطى .. أخذني الك ستر وغطى
غيرك أنت ما اللي حبيب .. ياشمس عمري لا تغيب
گلبي الك طير الگطى
..
معي لا تلعب بالخفى .. ملكك أنا بحب ووفى
ليله على صدر ليلاه .. يا مسعده النام وغفى
غيرك أنت ما اللى حبيب .. ياشمس عمري لا تغيب
گلبي الك طير الگطى
..
تبخل علي ابگبلة شفه .. گلبي العليل وعندك الشفى
أرحم بحالي عل جرالي .. زاد ناري وما طفى
غيرك أنت ما اللي حبيب .. ياشمس عمري لا تغيب
گلبي الك طير الگطى
..
أحلم معك بلحظة صفى .. همسك رگيگ كلامك دفى
ساحرني حسنك يا جمالك .. حاير أنا كيف أوصفه
غيرك أنت ما اللي حبيب .. ياشمس عمري لا تغيب
گلبي الك طير الگطى

حكمت البيداري
2001